ប្រជាពលរដ្ឋបាត់ក្របី៥ក្បាល រកឃើញសពក្របីផើម១ក្បាលត្រូវគេវះយកភ្លៅទាំង២ទៅបាត់ ប៉ុន្តែប្រទះឃើញមានទូរស័ព្ទ២គ្រឿងនៅក្បែរសពក្របីនោះ មានរូបភាពមន្រ្តីបរិស្ថាន

ខេត្តពោធិ៍សាត់៖ ប្រជាពលរដ្ឋភូមិចាមថ្មី ឃុំឈើតុំ ស្រុកក្រគរ ខេត្តពោធិ៍សាត់ បានរាយការណ៍កាលពីរសៀលថ្ងៃសៅរ៍ ទី៥ ខែធ្នូ ឆ្នាំ២០២០ម្សិលមិញនេះថា ៖ ពួកគាត់បានបាត់សត្វពាហនៈ (ក្របី)ចំនួន៥ក្បាល ប៉ុន្តែបានប្រទះឃើញចំនួន១ក្បាលហើយ ដោយគេវះយកភ្លៅ២ទៅបាត់ពីខ្លួនចេញកូនមកក្រៅយ៉ាងសង្វេគ ប៉ុន្តែនៅក្បែរខ្មោចសត្វក្របីនោះបែរមានទូរស័ព្ទចំនួន២គ្រឿង ក្នុងទូរស័ព្ទមានរូបភាពមន្រ្តីបរិស្ថាន។ តែក្របីចំនួន៤ក្បាលទៀតកំពុងសង្ស័យអាចគេដឹកឡើងរថយន្តទៅបាត់ ទោះជាយ៉ាងណាក្ដីពួកគាត់បានដាក់ពាក្យបណ្ដឹងរួមទាំងវត្ថុតាងទូរស័ព្ទ នៅប៉ុស្ដិ៍នគរបាលរដ្ឋបាលឈើតុំដើម្បីជួយអន្ដរាគមន៍រួចរាល់ហើយ តែដូចជាមានការយឺតយ៉ាវបន្តិច ។
ប្រភពរាយការណ៍ដដែលបន្តទៀតថា ការប្រទះឃើញសត្វក្របីដែលគេវះយកភ្លៅ និងបន្សល់នូវទូរស័ព្ទរ២គ្រឿងនេះ កាលពីរសៀលថ្ងៃទី៣ ខែធ្នូ ឆ្នាំ២០២០ នៅក្នុងព្រៃក្បែរផ្លូវចូលបន្ទាយយោធា(អភិវឌ្ឍន៍)នៃកងពលតូចអន្តរាគមន៍លេខ១៤ ត្រង់ចំណុចអូរសូដា ស្ថិតនៅភូមិភូមិក្បាលទាហាន ឃុំឈើតុំ ស្រុកក្រគរ ខេត្តពោធិ៍សាត់ ។
ពាក់ព័ន្ធបញ្ហាខាងលើនេះ លោក វរសេនីយ៍ឯក ឯម រុន អធិការនៃដ្ឋាននគរបាលស្រុកក្រគរ បានឲ្យដឹងតាមទូរស័ព្ទនារសៀលថ្ងៃទី៥ ខែធ្នូ ឆ្នាំ២០២០ នេះថា បាននឹងកំពុងចាត់ចែងកម្លាំងចុះពិនិត្យ និងស្រាវជ្រាវនៅកន្លែងកើតហេតុ ។ពាក់ព័ន្ធករណីសម្លាប់សត្វពាហនៈ (ក្របី)១ក្បាលខាងលើ ដោយមានទូរស័ព្ទរដៃមានរូបភាពជាប់ពាក់ព័ន្ធមន្រ្តីបរិស្ថាននេះ សូមរង់ចាំការស្រាវជ្រាវរបស់សមត្ថកិច្ចទាំងអស់គ្នា ៕